بوجندار_____عزالدين/ مدير نشر
بقلم: أذة____سعاد حسني
عاش تراب جماعة حربيل تامنصورت، هاد الأيام الأخيرة، على إيقاع جدل واسع، بسباب خرجة إعلامية ديال واحد المستشار جماعي هضر فيها على أجواء صلاة العيد بالمصلى المؤقتة لي كانت أصلا بقعة مخصصة للمهرجان المحلي ديال التبوريدة. هاد الخرجة اعتبرتها جمعية اتحاد جمعيات الفروسيه حربيل او بزاف ديال المتابعين للشأن المحلي قمة في “تبخيس” مجهودات جمعية اتحاد جمعيات حربيل للفورسية، ومحاولة واضحة للركوب السياسي على مبادرات مواطنة.
اسي المسؤول السياسي، إلى رجعنا للواقع وبعيداً على لغة الخشب والسياسة الحزبية قبل وقتها، الفضل الأول والأخير في هاد المبادرة كيرجع لـ “جمعية اتحاد جمعيات حربيل للفورسية”. هاد الإطار المدني هو لي طاح بـ “الفكرة”، ودار شراكة مع جماعة حربيل، وهو لي تكلف بجميع المراحل ديال التنقية، والصيانة، وتجهيز البقعة الأرضية باش تكون واجدة وكتليق بمهرجان جهوي أوفنفس الوقت مصلى العيد. الجماعة عطات الموافقة على المقترح فقط.
الغريب في الأمر، هو كفاش ناضوا بعض الناس عزيز عليهم الفتنة، وحركوا الماكينة ديالهم باش يرجعوا هاد الإنجاز المدني المحض لصالح جهات على حساب الجهة الحقيقة ، في محاولة واضحة لسرقة عرق وتعب الجمعية لي سهروا الليالي باش تنجح البقعة وتصلح تكون مصلى وذلك بالطبع مع شركاء. هاد السلوك ما كيتسمّاش فقط “ركوب على الموجة”، بل هو تجسيد لسياسة الإقصاء والتضييق لي كيتعرض ليها المجتمع المدني الجاد. عوض ما يتم تثمين هاد الخطوة وتشجيع العمل التشاركي، كنشوفو محاولات بئيسة لتقزيم دور الجمعيات بغرض تصفية حسابات ضيقة ولا لتلميع صور “خاوية” قدام الساكنة.
ساكنة حربيل تامنصورت اليوم عاقت وفاقت، وما بقاتش كتحركها الشعارات الخاوية فـ “الفيسبوك” ولا الخرجات لي باغة دير البوز. العمل الجمعوي الحقيقي كيبان فالأرض والميدان، وجمعية اتحاد جمعيات الفروسيه حربيل عطات درس فالمواطنة التلقائية. أما الركوب السياسي وتبخيس مجهودات الغير، فما هو إلا دليل على عقدة لذا البعض، وصاحب الفكرة الحقيقي كيبقا مسجل فالذاكرة ديال ولاد جماعة حربيل تامنصورت لي عارفين شكون لي ضرب تمارة وشكون لي جا لابس الجلباب نهار العيد باش يتصور.
الخلاصة ولي خاص كاع ولاد حربيل تامنصورت يعرفوها، هي أن الما يدوز على الحجر والجمعية بقات والسياسة زائلة. العمل الجمعوي الحقيقي كيبان بالأثر ديالو فالميدان ماشي بالصور وفصاحة اللسان فالفيسبوك. الساكنة اليوم عاقت وفاقت بـ’الطنازة’، وعارفة شكون لي هز البالة وفزك تيشرتو بالعرَق باش يجهز بقعة المحرك وليها المصلى في نفس الوقت، وشكون لي جا نهار العيد لابس القميص باغي يصور الإنجاز وينسبو لجهات أخرى فمحاولة بئيسة للإقصاء. الحقيقة واضحة بحال شمس النهار، الفضل لماليه، والركوب على المَوجة عمرو يصنع هيبة!