بوجندار_____عزالدين/ مدير نشر
كـارثة بـالعلالي فـدوار آيـت مـسعود جماعةحربيل.. الـشيك دازْ تـمْ تـمْ و”الـبوطو” بـاقي رجع لمكانو مـن 2024.. آش هـاد الـسيبة آسي الـمسؤول؟!
متابعة_____خاصة
فكل مرة كنقولو الأمور غادية تقاد فتراب جماعة حربيل، كتخرج لينا شي “فضائح” من قاع الخابية كتأكد باللي كاين للي عاطيها للنوم ويديه باردة على أرواح عباد الله. السكوت مابقاش مسموح بيه، والوضع فدوار “آيت مسعود” بجماعة حربيل مراكش وصل للعظم، والناس تما عايشة تحت رحمة الموت الصامت بسبب سلوكة ديال الضو والتماطل للي طال وتمدد من عام 2024 لليوم!
نعاودو للي جرى آسي المسؤول عن قطاع الكهرباء باش نذكروا الناسي للي نساو، ولا للي دايرين عين ميكة. في 2024، أاااااااااسي المسؤول عن القطاع، دخلات شاحنة فـ “بوطو” ديال الضو فدوار آيت مسعود. الحادثة ما دازتش فالسكات، تحركوا عناصر المركز الترابي للدرك الملكي بتامنصورت، وحضروا أعوان السلطة المحلية بقيادة حربيل، وحضرتي حتى انتا آسي المسؤول للي مكلف بالشبكة، ولحد هنا، القانون خدا مجراه ومزيان.. الطامة الكبرى وفين كاين “غميز العين” أاااااااااسي المسؤول عن القطاع هو أنه تم تصفية الحساب تما تما (تم تم)، وتخلصتي آسي المسؤول بشيك بالثمن للي طلبتي كتعويض على الخسائر ديال العمود الكهربائي. الفلوس دخلات، والأوراق ستفتوها، والمحضر تقيد.. ولكن السؤال للي كيزلزل الدوار اليوم، علاش أاااااااااسي المسؤول ما ردتوش العمود الكهربائي للي تعرض للحادث؟! وعلاش خليتو السلوكة عريانة ملوحة كتهدد الصغير والكبير؟
2024 لليوم، والوضع كارثي بامتياز. “عين مشافت وقلب ما وجع” هادي هي السياسة للي متبعة مع الساكنة. الأسلاك الكهربائية عريانة ودايزة بشكل عشوائي، والبوطو للي تخلصتو فقيمتو باقي شاهد على الاستهتار ديالكم أاااااااااسي المسؤول عن القطاع. واش كتسناو حتى توقع كارثة فشي دري صغير كيلعب فالدرب ماعرف ولو؟ ولا حتى توقع شي فاجعة تفقد فيها عائلة المعيل ديالها عاد تنوضو ديرو سيارات الإسعاف والبروتوكولات الخاوية؟ الدواوير المحيطة بتامنصورت عامة كتعاني من تهميش واضح فشبكة الإنارة والربط، ولكن أن توصل القضية تتخلص لكاش أااسي المسؤول” وتجاهل الإصلاح، فهادي ولات كتسمى “السيبة الموصوفة” وغياب التام للمسؤولية المواطنة.
من هاذ المنبر الحر، وبصوت ساكنة دوار آيت مسعود المتضررة والمقهورة، كنوجهو ليك الخطاب مباشرة آسي المسؤول الأول عن قطاع الكهرباء بتامنصورت وجماعة حربيل: أي مواطن، أي طفل، أي دابة تعرضت حياتهم ولا سلامتهم للخطر من دابا لفوق، راه انتا للي كتحمل المسؤولية الجنائية والأخلاقية كاملة.. والمحاسبة غتكون بالعلالي والقانون فوق الجميع.”
سي المسؤول عن القطاع بمراكش، نهار كتعلّم بالزيارة للإدارة بتامنصورت، كينوض “السانترال” وتيليفونات بعض مسؤولي مراكش كتصل وكتحذرهم من الغياب وكتوصيهم بالبشاشة والابتسامات الصفراء فوجه المرتفقين. وحنا أاااااااااسي المسؤول عن القطاع بمراكش ماكنكروش باللي كاين ولاد الناس موظفين شرفاء خدامين بنزاهة وجدية ويديهم نقية، ولكن “التبوريدة” للي كتدار فالمناسبات مابقاتش كتقضي أاااااااااسي المسؤول مع الساكنة، والساكنة أاااااااااسي المسؤول مابغاتش ابتسامة نهار الزيارة، بغات الاستمرارية والشفافية..