بوجندار_____عزالدين/ مدير نشر
أاااااااااسي المسؤول عن القطاع.. واش أربعة د الخدامة هما لي غادي يبنيو مدرسة؟! واش هذا ورش تنموي ولا الطنز على عباد الله؟!
تعيش ساكنة دوار القايد بتراب جماعة حربيل البور إقليم مراكش، هاد الأيام حالة من الاحتقان والغضب الشديد، بسبب التوقف المفاجئ وغير المبرر لأشغال بناء المدرسة الابتدائية بالدوار. هاد المشروع اللي كان كيمثل طوق نجاة وأمل لوليدات المنطقة واطمئنان للأسر باش يخفاف شبح الهدر المدرسي ومعاناة التنقل اليومي بين المنازل والمدرسةالوحيدة بالدور والتي توجد على الطريق الوطنية رقم 7، والتي تعاني من الاكتظاظ، لتتحول فجأة لـشبح مهجور يساءل ضمير سي المسؤول عن القطاع ومقدار وعودهم المتبخرة.
الساكنة تعبّر من “قاع الخابية” على استنكارها الواسع لهاد البلوكاج غير المفهوم، معتبرة أن توقف الآليات واختفاء العمال من ورش البناء كيشكل ضربة قاضية للموسم الدراسي المقبل، وتراجعاً خطيراً عن الالتزامات وتعهدات كناش التحملات اللي تدارت لفك العزلة وتوفير حق التعليم الدستوري لأبناء الدوار. العائلات أسي المسؤول عن القطاع، خرجات بصوت واحد كتساءل، شكون المسؤول على هاد العبث والمماطلة؟
وفالوقت اللي كتنتظر فيه الساكنة توضيحات رسمية أو تدخل عاجل من سي المسؤول لإعادة الروح لهاد الورش الهام، كيبان بلي سي المسؤول ماشي معنا، وواخد مسافة أمان بعيدة على هموم المواطنين. وهاد الصمت أسي المسؤول المطبق وسياسة الآذان المسدودة على الشأن المحلي والقطاعي بالمنطقة، كتأكد بالفجوة الكبيرة بين الشعارات ديالكم الخاوية بمحاربة الهدر المدرسي، وبين الواقع المر اللي كيعيشوه ولاد وبنات دوار القايد فكل دخول مدرسي.
أاااااااااسي المسؤول عن القطاع، واش فخبارك بلي هاد لبلاد غادية بقطار التنمية والتوجيهات الملكية السامية، وأنت كالس كتفرج فمشروع مدرسة كيتلاشى؟التعليم أسي المسؤول حق دستوري، وساكنة دوار القايد ما غادياش تسكت على هاد التهميش واللامبالاة. الوقت ديال الوعود المتبخرة تقاضى، والمطلوب دابا هو العودة الفورية للورش وإكمال البناء، وإلا فالمحاسبة وربط المسؤولية بالتقصير هي الفيصل!
هاد البطء المرفوض أسي المسؤول لي غادي به المشروع كيبين فيه الاستهتار بمستقبل وليدات دوار القايد. في الوقت أسي المسؤول لي البلاد كتسابق فيه الزمن فالمشاريع الكبرى، وهاد التماطل والتهميش أسي المسؤول عن القطاع فالبناء كيتسمى ضياع للوقت والجهد، وضرر مباشر لساكنة كتنتظر هاد المؤسسة بفارغ الصبر.الرسالة واضحة ليك أاااااااااسي المسؤول، وباراكا من المماطلة وسياسة الترقيع، راه أربعة خدامة فالموقع إهانة للساكنة، وتحدي للقانون ولدفاتر التحملات، والمطلوب منك دبا أسي المسؤول هو تحريك الآليات والعمال بكثافة.