بوجندار_____عزالدين/ المشاهد
متابعة : شطاط عبدالعزيز /أحمد بنالغربي
تفاعلا مع الشكايات اللي توصلات بيها جريدة المشاهد من ساكنة فيلاج قطارة بجماعة المنابهة دائرة البور اقليم مراكش، طاقم الجريدة تنقل للمكان باش يسمع مباشرة من الساكنة.
أول همّ طرحوه الناس هو الماء الصالح للشرب، اللي مقطوع عليهم لأكثر من ستة شهور، والساكنة كتعيش معاناة يومية مع العطش وغياب الحلول.
المشكل الثاني كان فالمستوصف: الطبيب اللي كان معروف بتجاوبه مع الساكنة تم تعويضو بطبيبة جديدة، واللي كتشكي منها الساكنة بسبب غياب التواصل، سوء المعاملة، وغياب الأدوية. بعض المرضى حتى قالو أنها كتجاوبهم بكلام جارح من قبيل “جريو جهدكم”.
النقل حتى هو واحد الهاجس كبير، حيث كاينة غير حافلة وحدة مع التسعة صباحا، واللي فاتاتو ضاع نهارو كامل، سواء كان غادي للكلية ولا للخدمة ولا حتى لقضاء أغراض مستعجلة.
أما دار الولادة اللي كانت مضرب للمثل فالتجهيز والطاقم، فولات كتخدم بلغة “سير حتى تجي”، والساكنة فقدو الثقة فيها.
وزيد عليها الحمام الوحيد فالدوار، اللي تابع للجماعة ومكتري لأحد الأشخاص، لكن تضرر وباقي مسدود كيتسنا الإصلاح والترميم.
من بعد ما استمع طاقم المشاهد لهذ المشاكل كلها، ربط الاتصال برئيس جماعة المنابهة. السيد الرئيس استقبل الطاقم، وكان متعاون، وعرض وثائق كيبين فيها أن المجلس راسل عدة جهات بخصوص الماء، الصحة والنقل، لكن بزاف من هذ المراسلات ما جاهاش جواب.
بالنسبة للماء، الرئيس أكد أنه تعقد اجتماع مع الشركة متعددة الخدمات مراكش آسفي، واللي وعدات بالتجاوب. النقل مازال كيتسنا الرد من الجهات المختصة. أما الحمام، فالإجراءات الإدارية فالطريق، وغادي يتم إصلاحو وإعادة تشغيلو وفق المعايير.
أما ما كيروج حول بيع الماء فالسهاويج، الرئيس نفى هذ الشي وقال أنه لا أساس له من الصحة.
المشاهد كتنقل صوت الساكنة بكل أمانة، وكتخلي الكرة دابا فملعب الجهات المسؤولة باش يتحركو ويجبدو حلول عاجلة لمعاناة أهل قطارة ..