بوجندار____عزالدين / مدير نشر
واش بغيتو تصفيوها للمرضى؟.. زلزال غضب بسبب “حقن السكارى” بمستوصف التشارك.
قلق وغضب، بسبب الوضع الصحي الكارثي، واحتقان اجتماعي واصل لدرجة الغليان، هادشي اللي كتعيشو ساكنة داور ايت مسعود وداور القايد بجماعة حربيل بضواحي مراكش. اذن ماهو السبب أاااااااااسي المسؤول عن قطاع الصحة؟ غياب حقن الأنسولين السريعة بالمركز الصحي القروي المستوى الأول (مركز التشارك) اللي جا الموقع تاعو بين دوار آيت مسعود ودوار القايد. وهاد المادة الحيوية أسي المسؤول عن القطاع اللي كتعتبر مسألة حياة أو موت بالنسبة للمئات من مرضى السكري بالمنطقة، مقطوعة هادي شحال، والمسؤولين دايرين عين ميكة!
الساكنة أسي المسؤول، عبرت على غضب شديد واستياء من هاد الإهمال الطبي. فبعد سنوات طويلة من الانتظار أسى المسؤول والمطالبات باش يتفتح هاد المستوصف اللي تسرق وتخرب وتعاد التجهيز ديالو وتدشن، تصدموا المواطنين بواقع مرير آآآآه أسي المسؤول، بناية زوينة من برا، ولكن من لداخل مكاينش الدوا د السكارى. المرضى، وخصوصاً الدرويش والمسن والفقير اللي ما عندو جهد لثمن الصيدليات، كيمشيو كل صباح على أمل ياخدو الحقنة السريعة ديالهم، وكترجعو وجهم شاحفة لأن الجواب أسي المسؤول عن قطاع الصحة هو مكاينش.. سيرو حتى يرسلوها..
هاد الغياب التام للأنسولين أاااااااااسي المسؤول عن القطاع بمثابة حكم بالإعدام البطيء على الفئات الهشة والفقيرة. الساكنة هنا تتساءل، كيفاش مشروع ميزانيتو صحيحة ومحطوط فمنطقة خلاء بعيدة، وملي كتوصل ليه بمشقة الأنفس، ما كتلقاش حتى قرعة د لانسولين؟ واش هذا هو شعار تقريب الخدمات الصحية وتعميم الحماية الاجتماعية، ولو أسي المسؤول كيبقى غير حبر على ورق فإقليم مراكش؟المواطنون فدوار القايد وآيت مسعود كيوجهو صرخة مستعجلة للمندوبية الإقليمية لوزارة الصحة والحماية الاجتماعية بمراكش، وللجهات الوصية على الشأن المحلي بحربيل، باش يتدخلو دابا قبل غدا ويوفروا هاد المادة الحيوية. فالأرواح د العباد أسى المسؤول ماشى لعبة، والسكوت على هاد التهميش غدي يخرج الأمور على السيطرة، لأن الصحة والكرامة خط أحمر أسي المسؤول.